EPFO ସୁଧ ଅପଡେଟ୍: ଆର୍ଥିକ ବର୍ଷ ୨୦୨୬ (FY26) ର ସୁଧ କେବେ ମିଳିବ ଏବଂ ଏହାକୁ କେମିତି ଯାଞ୍ଚ କରିବେ?
କର୍ମଚାରୀ ଭବିଷ୍ୟ ନିଧି ସଂଗଠନ (EPFO) ର ‘ସେଣ୍ଟ୍ରାଲ୍ ବୋର୍ଡ ଅଫ୍ ଟ୍ରଷ୍ଟିଜ୍’ (CBT) ଗତ ମାର୍ଚ୍ଚ ୨୦୨୬ ରେ ଘୋଷଣା କରିଥିଲେ ଯେ, ଆର୍ଥିକ ବର୍ଷ ୨୦୨୫-୨୬ ପାଇଁ ପିଏଫ୍ (EPF) ସୁଧ ହାରକୁ ୮.୨୫% ରେ ଅପରିବର୍ତ୍ତିତ ରଖାଯାଇଛି। ତେବେ ଏହି ଘୋଷଣାର ଦୁଇ ମାସରୁ ଅଧିକ ସମୟ ବିତିଯାଇଥିଲେ ମଧ୍ୟ ସୁଧ ଟଙ୍କା ଏପର୍ଯ୍ୟନ୍ତ କର୍ମଚାରୀଙ୍କ ଆକାଉଣ୍ଟକୁ ଆସିନାହିଁ।
ସୁଧ ଟଙ୍କା କେବେ ଜମା ହେବ?
ଶ୍ରମ ଏବଂ ନିୟୋଜନ ମନ୍ତ୍ରଣାଳୟର ଗତ ମାର୍ଚ୍ଚ ୨ ର ପ୍ରେସ୍ ବିଜ୍ଞପ୍ତି ଅନୁସାରେ, ବୋର୍ଡ ୮.୨୫% ସୁଧ ଦେବାକୁ ସୁପାରିଶ କରିଛି। ସାଧାରଣତଃ ଏହି ସୁପାରିଶ ପରେ ଅର୍ଥ ମନ୍ତ୍ରଣାଳୟର ଚୂଡ଼ାନ୍ତ ଅନୁମୋଦନ ଆବଶ୍ୟକ ହୋଇଥାଏ।
ଆଶା କରାଯାଉଛି ଯେ ଆସନ୍ତା କିଛି ମାସ ମଧ୍ୟରେ (ସାଧାରଣତଃ ପାର୍ବଣ ଋତୁ ବା ଅକ୍ଟୋବର-ନଭେମ୍ବର ସୁଦ୍ଭା) ସରକାରୀ ପ୍ରକ୍ରିୟା ଶେଷ ହେବା ପରେ ସମସ୍ତ ପିଏଫ୍ ଖାତାଧାରୀଙ୍କ ଆକାଉଣ୍ଟରେ ଏହି ସୁଧ ଟଙ୍କା ଏକାସଙ୍ଗେ ଜମା (Credit) କରାଯିବ।
ଆପଣଙ୍କ ପିଏଫ୍ (PF) ବାଲାନ୍ସ ଏବଂ ସୁଧ କେମିତି ଟ୍ରାକ୍ କରିବେ?
ଆପଣଙ୍କ ଆକାଉଣ୍ଟକୁ ସୁଧ ଟଙ୍କା ଆସିଛି କି ନାହିଁ, ତାହା ଆପଣ ୪ଟି ସହଜ ଉପାୟରେ ଘରେ ବସି ଯାଞ୍ଚ କରିପାରିବେ:
୧. ଉମଙ୍ଗ ଆପ୍ (UMANG App) ବ୍ୟବହାର କରି:
- ନିଜ ମୋବାଇଲରେ UMANG ଆପ୍ ଡାଉନଲୋଡ୍ କରନ୍ତୁ।
- ଏହାପରେ ‘EPFO’ ସେବାକୁ ବାଛନ୍ତୁ।
- ’View Passbook’ ଉପରେ କ୍ଲିକ୍ କରି ନିଜର UAN ଏବଂ ମୋବାଇଲକୁ ଆସିଥିବା OTP ଦେଇ ଲଗ୍-ଇନ୍ କରନ୍ତୁ। ଏଠାରେ ଆପଣ ସୁଧ ଟଙ୍କାର ସବିଶେଷ ତଥ୍ୟ ଦେଖିପାରିବେ।
୨. EPFO ପୋର୍ଟାଲ୍ ମାଧ୍ୟମରେ:
- EPFO ର ଅଫିସିଆଲ୍ ପାସବୁକ୍ ୱେବସାଇଟ୍କୁ ଯାଆନ୍ତୁ।
- ଆପଣଙ୍କ UAN, ପାସୱାର୍ଡ ଏବଂ କ୍ୟାପଚା କୋଡ୍ (Captcha) ଦେଇ ଲଗ୍-ଇନ୍ କରନ୍ତୁ।
- ନିଜର ମେମ୍ବର ଆଇଡି (Member ID) ବାଛି ପାସବୁକ୍ ଦେଖନ୍ତୁ, ଯେଉଁଥିରେ ସର୍ବଶେଷ ସୁଧ ଜମା ହୋଇଥିବା ତାରିଖ ସହ ଦେଖାଯିବ।
୩. ଏସଏମଏସ (SMS) ପଠାଇ:
- ଆପଣଙ୍କ ରେଜିଷ୍ଟର୍ଡ ମୋବାଇଲ୍ ନମ୍ବରରୁ EPFOHO UAN ENG ଲେଖି 7738299899 ନମ୍ବରକୁ ଏକ ମେସେଜ୍ ପଠାନ୍ତୁ। (ଶେଷ ୩ଟି ଅକ୍ଷର ‘ENG’ ଇଂରାଜୀ ଭାଷା ପାଇଁ, ଯଦି ଓଡ଼ିଆରେ ଚାହାଁନ୍ତି ତେବେ ‘ORI’ ଲେଖିପାରିବେ)। ତୁରନ୍ତ ଆପଣଙ୍କ ମୋବାଇଲକୁ ବାଲାନ୍ସର ମେସେଜ୍ ଆସିଯିବ।
୪. ମିସ୍ଡ କଲ୍ (Missed Call) ଦେଇ:
- ନିଜର ରେଜିଷ୍ଟର୍ଡ ମୋବାଇଲ୍ ନମ୍ବରରୁ କେବଳ 9966044425 ନମ୍ବରକୁ ଏକ ମିସ୍ଡ କଲ୍ ଦିଅନ୍ତୁ। କଲ୍ଟି ସ୍ୱୟଂଚାଳିତ ଭାବେ କଟିଯିବା ପରେ ଆପଣଙ୍କ ଆକାଉଣ୍ଟର ସମ୍ପୂର୍ଣ୍ଣ ବିବରଣୀ SMS ମାଧ୍ୟମରେ ମିଳିଯିବ।
