କୃତ୍ରିମ ବୁଦ୍ଧିମତା ବା ଆର୍ଟିଫିସିଆଲ୍ ଇଣ୍ଟେଲିଜେନ୍ସ (AI) କୁ ନେଇ କମ୍ପାନୀର ଦୁର୍ବଳ ପୂର୍ବାନୁମାନ ୱାଲ୍ ଷ୍ଟ୍ରିଟ୍ (Wall Street) ର ବିନିଯୋଗକାରୀଙ୍କୁ ନିରାଶ କରିଛି। ଏହା ପରେ ଗୁରୁବାର (୪ ଜୁନ୍) ଦିନ ପ୍ରମୁଖ ଟେକ୍ କମ୍ପାନୀ ‘ବ୍ରଡକମ୍ ଇଙ୍କ୍’ (Broadcom Inc) ର ସେୟାର ମୂଲ୍ୟରେ ୧୫.୩% ର ବଡ଼ ହ୍ରାସ ଘଟିଛି। ନ୍ୟୁୟର୍କ ଷ୍ଟକ୍ ଏକ୍ସଚେଞ୍ଜ (NYSE) ରେ କମ୍ପାନୀର ସେୟାର ଦର ପ୍ରତି କିତ୍ତା ପିଛା ପ୍ରାୟ $୪୦୬ କୁ ଖସି ଆସିଛି। କମ୍ପାନୀର ଦ୍ୱିତୀୟ ତ୍ରୈମାସିକ ଆର୍ଥିକ ରିପୋର୍ଟ ସହିତ ଆର୍ଥିକ ବର୍ଷ ୨୦୨୬ ଏବଂ ୨୦୨୭ ପାଇଁ ନିଜର AI ରାଜସ୍ୱ ଆଶାକୁ ନ ବଢ଼ାଇବା ପାଇଁ କମ୍ପାନୀ ନେଇଥିବା ନିଷ୍ପତ୍ତି ଯୋଗୁଁ ବିନିଯୋଗକାରୀମାନେ ନିରାଶ ହୋଇଛନ୍ତି।

​ଯଦି ବଜାର ବନ୍ଦ ହେବା ପର୍ଯ୍ୟନ୍ତ ଏହି କ୍ଷତି ଜାରି ରହେ, ତେବେ ଏହା ଜାନୁଆରୀ ୨୦୨୫ ପରେ କମ୍ପାନୀର ସବୁଠାରୁ ବଡ଼ ଏକଦିବସୀୟ ହ୍ରାସ ହେବ। ଏହା ଦ୍ୱାରା କମ୍ପାନୀର ପ୍ରାୟ $୨.୨୬୮ ଟ୍ରିଲିୟନର ମୋଟ ବଜାର ମୂଲ୍ୟ (Market Value) ରୁ $୩୦୦ ବିଲିୟନ (ପ୍ରାୟ ₹୨୫ ଲକ୍ଷ କୋଟିରୁ ଅଧିକ) ମାଟିରେ ମିଶିଯାଇପାରେ।

​ଏହି ବଡ଼ ହ୍ରାସ ପୂର୍ବରୁ, ୨୦୨୬ ବର୍ଷର ପ୍ରଥମ ୫ ମାସ ମଧ୍ୟରେ ବ୍ରଡକମ୍‌ର ସେୟାର ବହୁତ ଭଲ ପ୍ରଦର୍ଶନ କରୁଥିଲା। ଏହି ବର୍ଷ କମ୍ପାନୀର ସେୟାର ପ୍ରାୟ ୩୮% ବୃଦ୍ଧି ପାଇଥିଲା। ବିଶେଷ କରି ଏହାର ପ୍ରତିଦ୍ୱନ୍ଦ୍ୱୀ କମ୍ପାନୀ ‘ମାର୍ଭେଲ୍ ଟେକ୍ନୋଲୋଜି’ (Marvell Technology) ର ଭଲ ଆର୍ଥିକ ଫଳାଫଳ ଆସିବା ପରେ, ଗତ ଦୁଇ ସପ୍ତାହ ମଧ୍ୟରେ ବ୍ରଡକମ୍ ସେୟାରରେ ୧୫% ର ବୃଦ୍ଧି ଦେଖିବାକୁ ମିଳିଥିଲା।

​କେବଳ ଗତ ୫ଟି କାରବାର ଦିବସ (Trading Sessions) ମଧ୍ୟରେ, AI କୁ ନେଇ ବଜାରରେ ଥିବା ଉତ୍ସାହ ଯୋଗୁଁ ବ୍ରଡକମ୍‌ର ବଜାର ମୂଲ୍ୟରେ ପ୍ରାୟ $୨୭୦ ବିଲିୟନ ଯୋଡ଼ି ହୋଇଥିଲା।

​ସୂଚନାଯୋଗ୍ୟ ଯେ, ୨୦୨୨ ମସିହାରେ ଓପନଏଆଇ (OpenAI) ର ଚାଟ୍‌ଜିପିଟି (ChatGPT) ଲଞ୍ଚ ହେବା ପୂର୍ବରୁ ବ୍ରଡକମ୍‌ର ସେୟାର ଅନେକ ବର୍ଷ ଧରି ଚାପରେ ରହିଥିଲା। ହେଲେ ଚାଟ୍‌ଜିପିଟି ଆସିବା ପରେ ଏହାର ଗତି ବଦଳିଥିଲା ଏବଂ AI ଯୋଗୁଁ ସେୟାର ଦର ହୁ ହୁ ହୋଇ ବଢ଼ିଥିଲା। କିନ୍ତୁ ବର୍ତ୍ତମାନ AI ଚିପ୍ ରାଜସ୍ୱକୁ ନେଇ କମ୍ପାନୀ ଦେଇଥିବା ଦୁର୍ବଳ ପୂର୍ବାନୁମାନ ଯୋଗୁଁ ଏହି ‘AI-ର‍୍ୟାଲି’ (AI-driven rally) ଆଗରେ ଏକ ନୂଆ ଆହ୍ୱାନ ସୃଷ୍ଟି ହୋଇଛି।