By ନିଜର ଇଞ୍ଜିନ ଲିଜ୍ ଦେଇଥିବା ସଂସ୍ଥା ‘ସନବର୍ଡ ଫ୍ରାନ୍ସ ୦୨ ଏସଏଏସ’ (Sunbird France 02 SAS) ସହ ଚାଲିଥିବା ଏକ ବିବାଦ ମାମଲାରେ ଦିଲ୍ଲୀ ହାଇକୋର୍ଟ ଆର୍ଥିକ ସଙ୍କଟ ଦେଇ ଗତି କରୁଥିବା ବିମାନ ସେବା ସଂସ୍ଥା ସ୍ପାଇସଜେଟ୍ (SpiceJet) କୁ ଏକ ବଡ଼ ନିର୍ଦ୍ଦେଶ ଦେଇଛନ୍ତି। ପ୍ରାୟ ୮ ମିଲିୟନ ଡଲାର (ପ୍ରାୟ ୬୬ କୋଟିରୁ ଅଧିକ ଟଙ୍କା)ର ବାକି ଲିଜ୍ ଭଡ଼ା ଏବଂ ରକ୍ଷଣାବେକ୍ଷଣ ଖର୍ଚ୍ଚ ଆଦାୟ ପାଇଁ ଦାୟର ଏହି ମାମଲାରେ ୨ ସପ୍ତାହ ମଧ୍ୟରେ ନିଜର ସମସ୍ତ ସମ୍ପତ୍ତିର ବିବରଣୀ ପ୍ରଦାନ କରି ଏକ ଆଫିଡେଭିଟ୍ (ହଲଫନାମା) ଦାଖଲ କରିବାକୁ କୋର୍ଟ କହିଛନ୍ତି।
ମଙ୍ଗଳବାର ଦିନ ଜଷ୍ଟିସ ବିକାଶ ମହାଜନ ଏହି ନିର୍ଦ୍ଦେଶ ଦେଇଛନ୍ତି। ସନବର୍ଡ ପକ୍ଷରୁ କୋର୍ଟରେ ଅନୁରୋଧ କରାଯାଇଥିଲା ଯେ, ଯଦି ସ୍ପାଇସଜେଟ୍ ନିଜର ବାକି ଟଙ୍କା ପରିଶୋଧ କରିବାରେ ବିଫଳ ହୁଏ, ତେବେ ସେମାନଙ୍କ ସ୍ୱାର୍ଥର ସୁରକ୍ଷା ପାଇଁ କୋର୍ଟ କିଛି ସୁରକ୍ଷାମୂଳକ ନିର୍ଦ୍ଦେଶ ଜାରି କରନ୍ତୁ। ଏଥିପାଇଁ ସ୍ପାଇସଜେଟ୍ର ସମ୍ପତ୍ତି ବିଷୟରେ ଜାଣିବା ଜରୁରୀ। କୋର୍ଟଙ୍କ ଛୁଟି (vacation) ପରେ ଏହି ମାମଲାର ପରବର୍ତ୍ତୀ ଶୁଣାଣି ହେବ।
ଏୟାରଲାଇନ୍ସର ଖରାପ ଆର୍ଥିକ ସ୍ଥିତିକୁ ଦୃଷ୍ଟିରେ ରଖି ଲିଜ୍ ପ୍ରଦାନକାରୀ ସଂସ୍ଥା ସନବର୍ଡ ତୁରନ୍ତ ସୁରକ୍ଷାମୂଳକ ପଦକ୍ଷେପ ସ୍ୱରୂପ ସମ୍ପତ୍ତି ପ୍ରକାଶ କରିବାକୁ ଦାବି କରିଥିଲା। ସନବର୍ଡର ଓକିଲ ଯୁକ୍ତି ବାଢ଼ିଥିଲେ ଯେ, ସ୍ପାଇସଜେଟ୍ ବର୍ତ୍ତମାନ ପ୍ରବଳ ଆର୍ଥିକ ଚାପରେ ରହିଛି। ଏହା ସହିତ ନ୍ୟାସନାଲ କମ୍ପାନୀ ଲ’ ଟ୍ରିବ୍ୟୁନାଲ (NCLT) ରେ ସ୍ପାଇସଜେଟ୍ ବିରୋଧରେ ୧୬ଟି ଦେବାଳିଆ (insolvency) ଆବେଦନ ବିଚାରାଧୀନ ରହିଛି, ଯାହା ଦର୍ଶାଉଛି ଯେ ଏହି ବିମାନ ସଂସ୍ଥା ଯେକୌଣସି ସମୟରେ ଦେବାଳିଆ ପ୍ରକ୍ରିୟା ମଧ୍ୟକୁ ଚାଲିଯାଇପାରେ।
