By ସହରର ଅଣନିଶ୍ୱାସୀ ଟ୍ରାଫିକ୍ ଭିତରେ ବାରମ୍ବାର କ୍ଲଚ୍ ଦାବି ଗିଅର୍ ବଦଳାଇବାର କଷ୍ଟରୁ ମୁକ୍ତି ପାଇବା ପାଇଁ ଆଜି ପ୍ରତ୍ୟେକ କାର୍ କ୍ରେତାଙ୍କ ପ୍ରଥମ ପସନ୍ଦ ପାଲଟିଛି ‘ଅଟୋମେଟିକ୍ ଗାଡ଼ି’। ମାତ୍ର ବଜାରକୁ ଗଲା ପରେ ସବୁଠୁ ବଡ଼ ଦ୍ୱନ୍ଦ୍ୱ ସୃଷ୍ଟି ହେଉଛି ଇଲେକ୍ଟ୍ରିକ୍ (ଇଭି) ଅଟୋମେଟିକ୍ ନେବା ଉଚିତ୍ ହେବ ନା ପାରମ୍ପରିକ ପେଟ୍ରୋଲ୍ ଅଟୋମେଟିକ୍? ଉଭୟ ଗାଡ଼ିର ଖର୍ଚ୍ଚ, ସୁବିଧା ଓ ବ୍ୟବହାରକୁ ତୁଳନା କଲେ ଅସଲ ସତ ସାମ୍ନାକୁ ଆସେ।
ପକେଟ୍ ଖର୍ଚ୍ଚ କଥା ବିଚାର କଲେ ଇଲେକ୍ଟ୍ରିକ୍ କାର୍ ବହୁତ ଆଗରେ। ଯଦି ଜଣେ ବ୍ୟକ୍ତି ସହର ଭିତରେ ପ୍ରତିଦିନ ହାରାହାରି ୨୦ କିଲୋମିଟର ଯାତ୍ରା କରନ୍ତି, ତେବେ ୟୁନିଟ୍ ପିଛା ୮ ଟଙ୍କା ବିଦ୍ୟୁତ୍ ଦର ହିସାବରେ ଇଭିରେ ଦୈନିକ ଖର୍ଚ୍ଚ ହୁଏ ମାତ୍ର ୨୪ ଟଙ୍କା। କିନ୍ତୁ ପେଟ୍ରୋଲ୍ ଅଟୋମେଟିକ୍ ଗାଡ଼ିରେ ୧୦୦ ଟଙ୍କା ତେଲ ଦର ଏବଂ ୧୨ କିଲୋମିଟର ମାଇଲେଜ୍ ହିସାବ କଲେ, ସେହି ୨୦ କିଲୋମିଟର ପାଇଁ ପ୍ରତିଦିନ ପ୍ରାୟ ୧୬୫ ରୁ ୧୭୦ ଟଙ୍କା ଖର୍ଚ୍ଚ ହୁଏ। ଅର୍ଥାତ୍ ମାସ ଶେଷରେ ଇଭି ପ୍ରାୟ ୮୫ ପ୍ରତିଶତ ପର୍ଯ୍ୟନ୍ତ ତେଲ ଖର୍ଚ୍ଚ ବଞ୍ଚାଇ ଦିଏ।ଚଳାଇବାର ଅନୁଭୂତି କ୍ଷେତ୍ରରେ ମଧ୍ୟ ଇଭି ବେଶ୍ ଆରାମଦାୟକ। ଏଥିରେ କୌଣସି ପାରମ୍ପରିକ ଗିଅରବକ୍ସ ନଥାଏ। ଏକ୍ସିଲିରେଟର ଦବାଇବା ମାତ୍ରେ ଗାଡ଼ି ବିନା ଶବ୍ଦରେ ଏବଂ କୌଣସି ଝଟକା ନଦେଇ ସୁରୁଖୁରୁରେ ଆଗକୁ ବଢ଼େ। ଅନ୍ୟପଟେ ଶସ୍ତା ପେଟ୍ରୋଲ୍ ଅଟୋମେଟିକ୍ ଗାଡ଼ିରେ ଗିଅର୍ ବଦଳିବା ବେଳେ ଗୋଟିଏ ଛୋଟ ଝଟକା ଅନୁଭୂତ ହୁଏ। ଏହାସହ ଇଭିରେ ଇଞ୍ଜିନ୍ ଅଏଲ୍, ସ୍ପାର୍କ ପ୍ଲଗ୍ କିମ୍ବା ଫିଲ୍ଟର୍ ଭଳି ଜିନିଷ ନଥିବାରୁ ଏହାର ନିୟମିତ ସର୍ଭିସିଂ ଖର୍ଚ୍ଚ ପ୍ରାୟ ନଥାଏ।
କିନ୍ତୁ ସବୁ ସୁବିଧା ପରେ ବି ପେଟ୍ରୋଲ୍ ଗାଡ଼ିର ଗୋଟିଏ ବଡ଼ ଶକ୍ତି ରହିଛି, ତାହା ହେଲା ଚାର୍ଜିଂ ଝିଞ୍ଜଟରୁ ମୁକ୍ତି। ସମାନ ମଡେଲ୍ର ଇଭି କିଣିବାକୁ ଗଲେ ପେଟ୍ରୋଲ୍ ତୁଳନାରେ ୩ ରୁ ୫ ଲକ୍ଷ ଟଙ୍କା ଅଧିକ ପଡ଼ିଥାଏ। ଦ୍ୱିତୀୟରେ, ଯଦି ନିଜ ଘରେ ଗାଡ଼ି ଚାର୍ଜ କରିବାର ସ୍ୱତନ୍ତ୍ର ବ୍ୟବସ୍ଥା ନାହିଁ, ତେବେ ବାହାର ଚାର୍ଜିଂ ଷ୍ଟେସନ୍ ଉପରେ ନିର୍ଭର କରିବା ବେଶ୍ କଷ୍ଟକର। ଦୂର ଯାତ୍ରା ବେଳେ ବାଟରେ ଚାର୍ଜ ସରିଯିବାର ଭୟ ରହୁଥିବା ବେଳେ ପେଟ୍ରୋଲ୍ ଗାଡ଼ି ମାତ୍ର ୫ ମିନିଟ୍ରେ ତେଲ ପକାଇ ହଜାର ହଜାର କିଲୋମିଟର ଯାଇପାରେ।
ନିଷ୍କର୍ଷ ଏତିକି ଯଦି ଆପଣଙ୍କ ଦୈନନ୍ଦିନ ଯାତାୟାତ କେବଳ ସହର ଭିତରେ ସୀମିତ ଏବଂ ଘରେ ଚାର୍ଜ କରିବାର ସୁବିଧା ଅଛି, ତେବେ ଇଭି ଅଟୋମେଟିକ୍ ସବୁଠୁ ବୁଦ୍ଧିମାନ ପସନ୍ଦ। ମାତ୍ର ବଜେଟ୍ କମ୍ ଥିଲେ, ବାରମ୍ବାର ଦୂର ଯାତ୍ରା କରୁଥିଲେ କିମ୍ବା ଘରେ ଚାର୍ଜିଂ ପଏଣ୍ଟ ନଥିଲେ, ପେଟ୍ରୋଲ୍ ଅଟୋମେଟିକ୍ ଆଜି ବି ସବୁଠୁ ନିରାପଦ ଓ ଭରସାଯୋଗ୍ୟ।
