ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ଅଲିଭ୍ ରିଡଲେ ସାମୁଦ୍ରିକ କଇଁଛଙ୍କ ସୁରକ୍ଷା ଓ ସଂରକ୍ଷଣ ପାଇଁ ଉଚ୍ଚ କ୍ଷମତା ସମ୍ପନ୍ନ କମିଟି ବୈଠକ ଅନୁଷ୍ଠିତ
୨୦୨୫-୨୬ ଗଣ ଅଣ୍ଡାଦାନ ଋତୁକୁ ଦୃଷ୍ଟିରେ ରଖି ଅଲିଭ୍ ରିଡଲେ ସାମୁଦ୍ରିକ କଇଁଛଙ୍କ ସୁରକ୍ଷା ଓ
ସଂରକ୍ଷଣ ପାଇଁ ଗଠିତ ଉଚ୍ଚ କ୍ଷମତା ସମ୍ପନ୍ନ କମିଟିର ଏକ ବୈଠକ ଆଜି ଅପରାହ୍ଣରେ ମୁଖ୍ୟ ଶାସନ ସଚିବ
ଶ୍ରୀ ମନୋଜ ଆହୁଜାଙ୍କ ଅଧ୍ୟକ୍ଷତାରେ ଲୋକସେବା ଭବନ ସ୍ଥିତ ସମ୍ମିଳନୀ କକ୍ଷରେ ଅନୁଷ୍ଠିତ
ହୋଇଯାଇଛି । ବୈଠକରେ ଗୃହ, ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗର ଅତିରିକ୍ତ ମୁଖ୍ୟ
ଶାସନ ସଚିବ ଶ୍ରୀ ସତ୍ୟବ୍ରତ ସାହୁଙ୍କ ସମେତ କମିଟିର ସଦସ୍ୟ ଥିବା ବିଭିନ୍ନ ବିଭାଗ
ଓ ସଂସ୍ଥାର ବରିଷ୍ଠ ପଦାଧିକାରୀ ଓ କର୍ତ୍ତୃପକ୍ଷ ଉପସ୍ଥିତ ଥିଲେ । ବୈଠକରେ ଅଲିଭ୍ ରିଡଲେ ସାମୁଦ୍ରିକ
କଇଁଛଙ୍କ ସୁରକ୍ଷା ଓ ସଂରକ୍ଷଣ ପାଇଁ ଗତ ବର୍ଷ ନିଆଯାଇଥିବା ଓ ଆଗାମୀ ପଦକ୍ଷେପ ସଂପର୍କରେ
ବିସ୍ତୃତ ଆଲୋଚନା କରାଯାଇଥିଲା ।
ଓଡ଼ିଶା ଉପକୂଳରେ ଅଲିଭ୍ ରିଡଲେ ସାମୁଦ୍ରିକ କଇଁଛଙ୍କ ଗତ ବିଭିନ୍ନ ୧୦ ବର୍ଷର ଗଣ ଅଣ୍ଡାଦାନ
ଆକଳନ ସଂପର୍କରେ ଉପସ୍ଥାପନ କରାଯାଇଥିଲା । ବିଶେଷ କରି ଅଧିକ ଗଣ ଅଣ୍ଡାଦାନ ହେଉଥିବା
ଗହୀରମଥା ବନ୍ୟପ୍ରାଣୀ ସାମୁଦ୍ରିକ ଅଭୟାରଣ୍ୟ ଓ ଋଷିକୂଲ୍ୟା ନଦୀ ମୁହାଣ ଅଂଚଳରେ ଅଣ୍ଡାଦାନ
ସଂପର୍କରେ ଆଲୋକପାତ କରାଯାଇଥିଲା । ଜଣାଯାଇଛି ଯେ, କେବଳ ଗହୀରମଥା ଓ ଋଷିକୂଲ୍ୟାରେ
୨୦୨୨-୨୦୨୩ ବର୍ଷରେ ମୋଟ ୧୧.୪୯ ଲକ୍ଷ କଇଁଛ ଗଣ ଅଣ୍ଡାଦାନ କରିଥିବା ବେଳେ ୨୦୨୩-୨୪ ରେ
ମାତ୍ର କେବଳ ଋଷିକୂଲ୍ୟା ଉପକୂଳରେ ୩.୦୧ ଲକ୍ଷ କଇଁଛ ଅଣ୍ଡା ଦାନ କରିଥିଲେ । କିନ୍ତୁ ଆଶ୍ଚର୍ଯଜନକ
ଭାବେ ୨୦୨୪-୨୦୨୫ ରେ ଗହୀରମଥାଠାରେ ୬.୦୭ ଲକ୍ଷ ଓ ଋଷିକୂଲ୍ୟାଠାରେ ୯.୦୪ ଲକ୍ଷ ଏହି ପରି
ମୋଟ ୧୫.୧୧ ଲକ୍ଷ ସମୁଦ୍ରିକ କଇଁଛ ଗଣ ଅଣ୍ଡାଦାନ କରିଛନ୍ତି ଯାହା ରେକର୍ଡ ସଂଖ୍ୟକ ହୋଇଛି ।
ଏହାର କାରଣ ସଂପର୍କରେ ବିଶେଷ ଜଣାପଡ଼ି ନଥିଲେ ମଧ୍ୟ ଏହା ଏକ ବୈଶ୍ୱିକ ପ୍ରକ୍ରିୟା ଏବଂ
ଅନୁକୂଳ ପରିବେଶ ଜନିତ କାରଣରୁ ହୋଇଥାଇପାରେ ବୋଲି ବୈଠକରେ ଆଲୋଚନା ପ୍ରକାଶ ପାଇଥିଲା
। ବୈଠକରେ ଗତ ବର୍ଷ ଡ଼ିସେମ୍ବର ୧୮ ତାରିଖରେ ଅନୁଷ୍ଠିତ ବୈଠକରେ ନିଷ୍ପତ୍ତି କାର୍ଯ୍ୟକାରିତା
ସଂପର୍କରେ ଆଲୋଚନା ପୂର୍ବକ ୨୦୨୪-୨୫ ରେ ପ୍ରସ୍ତୁତି ପରିପ୍ରେକ୍ଷୀରେ କାର୍ଯ୍ୟନୁଷ୍ଠାନ ଓ ୨୦୨୫-୨୬ ବର୍ଷ
ପାଇଁ ପ୍ରସ୍ତୁତି ସଂପର୍କରେ ବିସ୍ତୃତ ଆଲୋଚନା କରାଯାଇଥଲା । ନଭେମ୍ବର ୧ ତାରିଖରୁ ଆଗାମୀ ମଇ ୩୧
ତାରିଖ ପର୍ଯ୍ୟନ୍ତ ଅଲିଭ୍ ରିଡଲେ ସାମୁଦ୍ରିକ କଇଁଛଙ୍କ ସୁରକ୍ଷା ଓ ସଂରକ୍ଷଣ ପାଇଁ ଋତୁଭିତ୍ତିକ ପରିଚାଳନା
ଆରମ୍ଭ ହୋଇସାରିଛି । କେନ୍ଦ୍ରୀୟ ମନିଟରିଂ ୟୁନିଟ୍ ରାଜ୍ୟ ବନ୍ୟପ୍ରାଣୀ ମୁଖ୍ୟାଳୟରେ କାର୍ଯ୍ୟ କରୁଛି ।
ତଦାରଖ ପାଇଁ ହାଇସ୍ପିଡ ଡଙ୍ଗା, ଟ୍ରଲର, ସହାୟକ ଡଙ୍ଗା ନିୟୋଜିତ କରାଯାଇଛି । ସମସ୍ତ ଉପକୂଳ
ଫରେଷ୍ଟ ଡିଭିଜନ ଅଂଚଳରେ ୬୭ ଟି ପାଟ୍ରୋଲିଂ ଶିବିର ଆନୁଷଙ୍ଗିକ ସୁବିଧା ପୁନଃ କାର୍ଯ୍ୟକ୍ଷମ ହେବ ।
ଏଥି ପାଇଁ ପ୍ରତି ଡିଭିଜନ ସ୍ତରରେ ସମୁଦ୍ରରେ ଯୁଗ୍ମ ପାଟ୍ରୋଲିଂ ପାଇଁ ସମନ୍ୱୟ ବୈଠକ କରାଯାଉଛି ।
ଜିଲ୍ଲାପାଳ ଓ ଆରକ୍ଷୀ ଅଧିକ୍ଷକମାନଙ୍କ ସହଯୋଗ ନିଆଯାଉଛି । ଆନ୍ତଃ ବିଭାଗୀୟ
ସମନ୍ୱୟ ଯୋଗୁଁ ଅଲିଭ ରିଡଲେ କଇଁଛ ସୁରକ୍ଷା ଓ ସଂରକ୍ଷଣ କାର୍ଯ୍ୟ ପ୍ରଶଂସନୀୟ ରହିଥିବା ବୈଠକରେ
ଆଲୋଚନା କରାଯାଇଥିଲା ।
ମତ୍ସ୍ୟ ଓ ପ୍ରାଣୀ ସଂପଦ ବିକାଶ ବିଭାଗ ତରଫରୁ ନଭେମ୍ବର ୧ରୁ ୩୧ ମେ ପର୍ଯ୍ୟନ୍ତ ଧାମରା
ବନ୍ଦର, ଦେବୀ ନଦୀ ଓ ଋଷିକୂଲ୍ୟା ନଦୀ ମୁହାଣମାନଙ୍କରେ ଆଖପାଖ ୨୦ କି.ମି ପରିସର ମଧ୍ୟରେ
ମୋଟର ଚାଳିତ ମାଛଧରା ଡଙ୍ଗା ବ୍ୟବହାର ସଂପର୍କରେ ଏକକାଳୀନ ନିଷେଧ ଲାଗୁ କରାଯାଇଛି ।
ଗହୀରମଥା ଅଭୟାରଣ୍ୟ ଅଂଚଳରେ ଏହି କଟକଣା ବର୍ଷସାରା ରହିଛି । ଯେପରି ଏହି ବିରଳ
କଇଁଛମାନଙ୍କ ପ୍ରତି ବିପଦ ସୃଷ୍ଟି ନହୁଏ, ସେଥିପାଇଁ ଆଇନ୍ ଅନୁପାଳନ ପୂର୍ବକ ଖିଲାପକାରୀଙ୍କ ପ୍ରତି ଦୃଢ
କାର୍ଯ୍ୟାନୁଷ୍ଠାନ ଗ୍ରହଣ ବ୍ୟବସ୍ଥା ରହିଛି । ସମୂହ ଅଣ୍ଡାଦାନ ଋତୁରେ ମସ୍ୟଜୀବୀମାନେ ଆର୍ଥିକ ଭାବେ
ପ୍ରଭାବିତ ହେଉଥିବାରୁ ସେମାନଙ୍କ ସ୍ୱାର୍ଥକୁ ଦୃଷ୍ଟିରେ ରଖି ଠିକ୍ ସମୟରେ ସେମାନଙ୍କୁ କ୍ଷତିପୂରଣ ରାଶି
ପ୍ରଦାନ କରାଯିବାକୁ ମୁଖ୍ୟ ଶାସନ ସଚିବ ଗୁରୁତ୍ୱ ଦେଇଥିଲେ । ଓଡ଼ିଶାର ଉପକୂଳରେ ଅଲିଭ ରିଡଲେ
କଇଁଛଙ୍କ ସମୂହ ଅଣ୍ଡା ଦାନ ଏକ ବିରଳ ଓ ଅନନ୍ୟ ପ୍ରକ୍ରିୟା । ସେମାନଙ୍କର ସୁରକ୍ଷା , ସୁରକ୍ଷିତ ଅଣ୍ଡାଦାନ
ଓ ସଂରକ୍ଷଣକୁ ସୁବ୍ୟବସ୍ଥିତ କରିବାରେ ସଂପୃକ୍ତ ବିଭାଗ ଓ ସଂସ୍ଥାମାନଙ୍କର ସେ ସହଯୋଗ କାମନା
କରିବା ସହିତ ଏଥିନେଇ ରହୁଥିବା ସମସ୍ୟାର ସମାଧାନ ଓ ଆବଶ୍ୟକତା ପୂରଣ ନେଇ ପାରସ୍ପରିକ
ସମନ୍ୱୟ ଉପରେ ମୁଖ୍ୟ ଶାସନ ସଚିବ ବୈଠକରେ ଗୁରୁତ୍ୱ ଦେଇଛନ୍ତି ।
ଅଲିଭ ରିଡଲେ କଇଁଛଙ୍କର ଗତିବିଧି, ଅଣ୍ଡାଦାନ ସ୍ଥଳୀ ସଂପର୍କରେ ଜାଣିବା ପାଇଁ ୨୦୨୫ ରୁ ୨୦୨୯
ପର୍ଯ୍ୟନ୍ତ ଏକ ସାଟେଲାଇଟ୍ ଟେଲିମେଟ୍ରି ଅଧ୍ୟୟନ କାର୍ଯ୍ୟକାରୀ କରାଯାଇଛି ।
ବୈଠକରେ ଅନ୍ୟମାନଙ୍କ ମଧ୍ୟରେ ପ୍ରଧାନ ମୁଖ୍ୟ ବନ ସଂରକ୍ଷକ(ପିସିସିଏଫ୍) ଏବଂ ମୁଖ୍ୟ
ବନପାଳ – ଶ୍ରୀ ସୁରେଶ ପନ୍ଥଙ୍କ ସମେତ ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗ, ମତ୍ସ୍ୟ ଓ
ପ୍ରାଣୀ ସଂପଦ ବିଭାଗ, ଗୃହ ବିଭାଗରର ଅନ୍ୟ ବରିଷ୍ଠ ପଦାଧିକାରୀ, ବନ୍ୟପ୍ରାଣୀ ସଂସ୍ଥାନ ଡେରାଡୁନର
ବୈଜ୍ଞାନିକ ଡଃ. ଆର.ସୁରେଶ କୁମାର, ଉପକୂଳ ଅନ୍ତର୍ଗତ ସଂପୃକ୍ତ ସମସ୍ତ ବନଖଣ୍ଡ ଅଧିକାରୀ, ଧାମରା,
ପାରାଦ୍ୱୀପ ଓ ଗୋପାଳପୁର ବନ୍ଦର କର୍ତ୍ତୃପକ୍ଷ, ଆଇଟିଆର ବା ଭାରତୀୟ ପ୍ରତିରକ୍ଷା ଗବେଷଣା ପ୍ରତିଷ୍ଠାନ,
ଚାନ୍ଦିପୁର, ଭାରତୀୟ ତଟରକ୍ଷା ବାହିନୀର କମାଣ୍ଡାଣ୍ଟଙ୍କ ସମେତ ଉପକୂଳ ଅଂଚଳର ଅନ୍ୟ ବିଭିନ୍ନ ସଂସ୍ଥାର
ଉଚ୍ଚ କର୍ତ୍ତୃପକ୍ଷ, ବରିଷ୍ଠ ପ୍ରତିନିଧି ପ୍ରମୁଖ ବୈଠକରେ ଯୋଗ ଦେଇଥିଲେ
